Voting

Panagbotos ditoy Hawaii

ELEKSION ITI HAWAII

Ditoy Hawaii, maangay ti eleksion iti entero nga estado kada tawen nga ti maudi a numerona ket 0, 2, 4, 6, wenno 8. Ti maikadua a Sabado ti Agusto ket aldaw ti primaria. Mapasamak met ti eleksion heneral iti umuna a Martes a sumaruno iti umuna a Lunes ti Nobiembre.

Kitaen iti kalendaryo dagiti petsa ken “deadline” a mainaig iti eleksion

Segun ti Akta Numero 136, SLH 2019, dagiti eleksion ket maaramid babaen ti koreo. Sumangpet kadagiti botante a rehistrado ti naibuson a balota, manga sangapulo ket walo (18) nga aldaw sakbay ti aldaw ti botos, iti mailing address nga inrehistroda. Bisitaen ti Rehistro ti Botante tapno agpailista, wenno pabaruen ti rehistrasion.

Eleksion Primaria

Ti primaria, isu ti eleksion a pakapilian dagiti kandidato a pannakabaginto dagiti partido iti eleksion heneral. Iti kasta, dagiti kandidato nga awanan partido ket mai-nominar iti eleksion heneral, babaen ti panangtun-oyda kadagiti kalipikasion bilang “nonpartisan candidate” iti salisal a “partisan” (basado iti Partido).

Dagiti botantes ditoy Hawaii, saan nga agrehistro a katimpuyogda ti maysa a partido, según ti bilin ti Konstitusion ti Estado, tapno masaluadan ti kalinteganda iti privacy. Iti balota iti eleksion primaria, mangpili nga umuna dagiti botantes iti partido a kaykayatda, ket mangbotosda laeng iti kandidato manipud daydiay a lista.

Nupay kasta, mabalinda ti mangbotos iti kandidato para Office of Hawaiian Affairs, kasta met kadagiti salip para opisiales ti county, uray no ania a partido ti katimpuyogda.

Eleksion Heneral

Iti eleksion heneral, agpili dagiti botante iti kandidato a kayatda, uray no ania ti partidoda. Agpilida iti kandidato para dagiti posisyon iti federal, estado, county, ken Office of Hawaiian Affairs, kasta met kadagiti amendasion iti Konstitusion ti Estado ken/wenno kadagiti carta oficial a nangpundar iti maysa a gobyerno.

Eleksion ti Presidente

Awan primaria para presidente ditoy Hawaii. Dagiti partido ti makaammo a mangangay kadagiti kaukus a pagpilianda iti kandidatoda para presidente. Agdamag a deretso kadagiti kalipikado a partido no kayatmo ti maki-kaukus. Ti Kolehio Elektoral ti mangbotos iti presidente ken bise presidente ti Estados Unidos. Agadal panggep ti Kolehio Elektoral.

PANAGREHISTRO A BOTANTE

Tapno makapagrehistroka a botante ditoy Estado ti Hawaii,nasken a sika ket:

Makipagili iti Estados Unidos

Residente ti Hawaii

Agtawen iti sangapulo ket innem (16), wenno ad-adu

Ti tao nga agtawen iti sangapulo ket innem (16), palubosan ti linteg ti Hawaii nga agparehistro iti panagbotos. No madanonan ti maika-sangapulo ket walo (18) a tawenna, automatik a mayrehistro ken maibusunan iti balota.

Agadal pay panggep ti panagrehistro a botante.

BOTOS ITI KOREO

Itedmo ti Kabaruan nga Impormasion iti Rehistro ti Botante

Maibuson dagiti balota iti mailing address mo a rehistrado. No umakarka iti pagtaengan, sukatam ti naganmo wenno mailing address, nasken a pakaammuam ti Dibision ti Eleksion ti county a pagbotosam. I-kompirma iti internet wenno iti Dibision ti Eleksion nga umno met laeng ti impormasion iti rehistrom.

Idadateng ti Balota Kenka

Ti pakete ti balotam a naibuson, dumtengto iti mapattapatta a petsa:

Primarya: Hulyo 26, 2022
Heneral: Oktubre 21, 2022

Your packet consists of a ballot, ballot secrecy sleeve, and a prepaid postage return ballot envelope.

Voters with special needs may request for an electronic ballot through the Voter Registration Application or by contacting their County Elections Division.

Ipulang ti balotam

Ipulangmo ti balotam a nabotosanen iti buson, wenno iti personal iti naikudi a lugar a pangibatian iti county. Nasken a maawat ti Dibision ti Eleksion ti county a nagbotosam iti alas syete ti rabii iti aldaw ti eleksion, wenno nasapsapa.

Ammuem ti ayan ti balotam

Mabalinmo a suruten ti status ti balotam, no naibusonen ken/wenno naawaten. Damagem iti Dibision ti Eleksion.

Pannakaproseso ti balotam

No naawaten ti Dibision ti Eleksion ti county a nagbotosam daydiay return envelope mo, miraenda ti pirmam tapno makasiguradoda a sika met laeng ti nagbotos. No balido ti pirmam, itedda ti balotam kadagiti opisiales ti estado nga agbilang iti botos.

Panagbotos iti sentro ti serbisyo para botante

Dagiti Dibision ti Eleksion mangtudingda iti sentro a pagbotosan, ket aglukat dagitoy iti aldaw ti eleksion, ken sangapulo nga aldaw kasakbayanna. Ipaayda ti serbisyo nga “accesible” para ti personal a panagbotos ken rehistrasion iti maymaysa nga aldaw.

Dagiti Masansan a Saludsod Panggep ti Panagbotos ditoy Hawaii

Kasanoak nga agbotos?

Ti laeng nakarehistro a botante ti maibusunan iti balota. Basaen ken anagen sadiay dagiti nakasurat nga aramidem, dagiti salisal ken kandidato. Pumilika ti botosam. No awan kayat mo a kandidato iti maysa a salisal ket dika agbotos kadaytoy, awan epektona iti balotam.

Kupinen ti balota a nagbotosan, ket iserrek iti secrecy sleeve (panglinged). Ipan ti secrecy sleeve iti sobre a libre (return envelope), ket agpirma ditoy. Madi maibilang ti balotam no saan a pirmado ti return envelope.

Ibusonmo ti balotam, wenno ipan a personal iti naikudi a lugar a pangibatian. Nasken a maawat ti Dibision ti Eleksion ti county a nagbotosam iti alas syete ti rabii iti aldaw ti eleksion, wenno nasapsapa.

Ton ano ngata a sumangpet kaniak ti balotak?

Manamnama a maawatmo ti pakete ti balota a naibuson, iti mapattapatta a petsa:

Primarya: Hulyo 26, 2022
Heneral: Oktubre 21, 2022

No saan pay a simmangpet ti balotam, kiddawem a mangibuson ti Dibision ti Eleksion iti sukatna.

Ket no saan a simmangpet ti balota?

No saan pay a simmangpet ti balotam, agdamag iti Dibision ti Eleksion ket mangtedda iti sukatna.

Ket no agkamaliak iti balotak?

No agkamalika iti balotam, no mapukaw wenno madadael daytoy, mabalinmo a kiddawen a sukatan ti Dibision ti Eleksion.

No awan pinilik kadagiti dadduma a kandidato wenno pasungbat iti balotak, maibilang kadi latta ti botosko?

Wen, maibilang latta ti balotam.

No naipulangkon ti balota, mabalin ko a baliwan ti botosko?

Saanen. No insublimon ket naawaten ti Dibision ti Eleksion ti balotam, kayatna a sawen, nalpas kan a nagbotos, ket awanen ti gapuna a makaalaka pay iti baro a balota.

Apay pagpirmaendak iti sobre nga pangibusonak iti balotak?

Ti pirmam ket pakalasinan dagiti opisiales ti eleksion nga sika met laeng ti nagbotos. Ikumparada ti pirmam iti sobre nga nakaibusonan ti balota ken ti pirmam a nakarehistro. No saanmo a pirmaan ti sobre, saanda nga ibilang ti balotam.

Kasanoak nga agbotos no nakabakasyonakto, wenno agad-adalak iti adayo a kolehio?

No awankanto ditoy no eleksion (“absentee”), kiddawem a maibuson ti balotam iti sabali nga address. Mangkumpleto iti absentee application ket ibagam no ayan ti kayatmo a pakaibusunan ti balotam.

Makabotosak pay laeng iti personal?

Wen. Makabotoska iti personal kadagiti sentro ti serbisyo para botante. Nakalukat dagitoy iti sangapulo nga aldaw ken iti mismo nga eleksion. Ipaayda ti serbisyo nga “accesible” para ti personal a panagbotos ken rehistrasion iti maymaysa nga aldaw.

↑ Agsubli iti ngato

Panagbotos ti absentee

Ti kada rehistrado a botante ket automatik a maawatna ti balota a naibuson. Sumangpetto ti balota iti daytoy mapattapatta a petsa:

Primarya: Hulyo 26, 2022
Heneral: Oktubre 21, 2022

No ti botante ket awanto iti residensiana ditoy Hawaii no eleksion (“absentee”), mabalinna a kiddawen babaen ti Absentee Application a maibuson iti sabali nga address ti balotana, para primaria, eleksion heneral, wenno isuda a dua.

Ti nakumpleto nga aplikasion ket nasken a maawat ti dibision ti eleksion, saan nga naladladaw ngem pito (7) nga aldaw sakbay ti eleksion.

Ti nasapataan a deklarasion (affidavit) iti Absentee Ballot Application, adda pasetna para botantes nga addaan special needs, ket ditoy, mabalinda ti agkiddaw iti balota nga elektronika a may-email kadakuada iti kada eleksion.

Dagiti deadline wenno panawen a nasken a kamakamen

Damagen iti Dibision ti Eleksion ti ad-adu nga impormasion panggep ti panagbotos ti absentee.

↑ Agsubli iti ngato

Estudiante iti kolehio

No sika ket residente ti Hawaii nga agad-adal iti kolehio iti sabali nga estado, ngem kayatmo ti makipagbotos iti Hawaii, mangtedka ti Absentee Application ket kiddawem a maibuson ti balotam iti agdama nga address mo. Kasapulam ti Absentee Application tumunggal tawen ti eleksion nga awanka iti residensiam ditoy Hawaii.

Kasta met a no residenteka ti Hawaii nga agad-adal iti kolehio ditoy nga estado, mabalinmo ti mangted iti Absentee Application ket kiddawem a maibuson ti balotam iti address mo idiay pagadalam.

Ti Absentee Application ket nasken a maawat ti Dibision ti Eleksion, saan nga naladladaw ngem:

Primarya: Agusto 6, 2022
Heneral: Nobiembre 1, 2022

Damagen iti Dibision ti Eleksion no kasano ti mangala iti Sertipiko ti Rehistrado a Botante, wenno tapno maammuan ti ad-adu nga impormasion panggep ti panagbotos ti absentee.

↑ Agsubli iti ngato

Panagbotos ti Awanan Balay

Panagrehistro ti Botante

Makapagrehistro ti botante iti Internet, idiay Department of Motor Vehicles (DMV) no ag-apply iti lisensia ti agmaneho wenno Hawaii State ID) wenno iti nakumpleto nga Aplikasion iti Rehistro ti Botante. Dagiti papel nga panagrehistro iti DMV, ken ti Aplikasion iti Rehistro ti Botante, nasken a maipulangda iti petsa a

Primarya:Agusto 3, 2022 wenno nasapsapa.
Heneral: Oktubre 31, 2022 wenno nasapsapa.

Dagiti county Dibision ti Eleksion, ipaayda iti sentro ti serbisyo para botante ti panagrehistro iti aldaw ti panagbotos. Makapagrehistro ken makapagbotos iti personal ti baro a botante ti Hawaii. Kasta met a dagiti rehistrado a botante ti Hawaii, mapabaroda ti rehistrasionda ken makapagbotos iti personal. Para iti rehistro tapno agbotos, saan a kasapulan nga agdasig ti addressmo. No ti lisensia ti agmaneho wenno Hawaii State ID nga adda kenka ket daan ti address na, maibilang nga ID card mo, ket mausar daydiay numero daytoy nga agrehistro. Kasapulan daytoy nga ID a pammaneknek no siasinoka, saan a tapno maammuan ti address mo nga pagyanan wenno pangalaam iti surat.

Nasken laeng a mangtedka iti naan-anay a pammaneknek ti ID no wen ti sungbat amin dagitoy a tallo (3) a saludsod: (1) Itatta kadi laeng nga agrehistroka a botante iti Estado ti Hawaii, (2) Ibusonmo ti aplikasyon, (3) Awan kadi ti maitedmo a lisensia nga agmaneho ditoy Hawaii, State ID wenno Social Security Number iti aplikasyon mo.

Iti panangpaneknek iti ID, mabalin dagitoy:

Balido ken saan a nag-expire a photo ID, wenno

Baro a utility bill, bank statement, tseke nga inted ti gobierno, paycheck, wenno sabali a dokumento ti gobierno a pakakitaan iti nagan ken address ti aplikante.

Masapul ti residential address iti Aplikasion iti Rehistro ti Botante tapno masinunuo ti distrito a pagbotosam. Daytoy nga address ket aniaman a lugar iti county a mangiladawan iti pisikal a pagyanan ti botante. No ti pagyananna keta awan street addressna, mabalin dagiti sarita a mangitudo iti lugar, kas koma dagiti asideg a pagkurusan dagiti kalsada, wenno dagiti nalaka a malasin ken nalatak a pakatandaan iti lugar (landmarks).

Mabalin nga ited ti P.O. Box wenno sabali a panagawat iti buson, agraman ti general delivery, bilang mailing address aplikasion.

Ipaay ti Hawaii kadagiti sentro ti serbisyo para botante ti panagrehistro iti aldaw ti panagbotos para kadagiti kalipikado a citizen a madi nakapagrehistro iti deadline a tallopulo nga aldaw tapno maibusunan iti balota.

Panagbotos

Dagiti rehistrado a botante, maibusunan iti balota, ket maawatdanto dagitoy iti mapattapatta a petsa:

Primarya: Hulyo 26, 2022
Heneral: Oktubre 21, 2022

Automatik a maibuson ti balota iti address mo a rehistrado.

Mabalin met a piliem ti agbotos iti aniaman a sentro ti serbisyo para botante iti county nga ayanmo. Daytoy nga in-person service, agpaay iti amin a botante, kasta met a mabalin ti agrehistro iti aldaw ti panagbotos para kadagiti kalipikado a citizen a madi nakapagrehistro iti deadline. Aglukatda sangapulo (10) nga aldaw sakbay ti kada eleksion.

↑ Agsubli iti ngato

Panagbotos ti militar ken botante nga adda iti sabali a pagilian

Ti Uniformed and Overseas Citizens Absentee Voting Act (UOCAVA), ipalubosna ti panagbotos dagiti militar nga adayo, ken dagiti U.S. citizen nga agnaed iti ruar ti Estados Unidos.

Sinno dagiti Botante iti UOCAVA?

Dagiti militar a miembro dagiti Unipormado a Serbisios ti Estados Unidos

Dagiti assawa ken dependent dagitoy.

Dagiti U.S. citizen nga agnaed iti overseas, temporary man wenno awan masinunuo a sublida

Dagiti U.S. Citizen nga agnaed iti ruar ti Estados Unidos (overseas) ket botante pay iti UOCAVA. Mabalinda ti agkiddaw iti balota manipud iti naudi nga estado/county a nag-residensiaanda sakbay nagpa-overseas da. Dagiti botante iti UOCAVA a nayyanak iti ruar ti Estados Unidos, mabalinda ti agkiddaw iti balota manipud iti naudi nga estado/county a nag-residensiaan dagiti amma wenno innada sakbay nagpa-overseas dagiti nagannak.

Dagiti Botante iti UOCAVA, makapagrehistro a botante ken agkiddaw iti absentee ballot babaen ti Federal Post Card Application (FPCA). Nasken a sumangpet ti FPCA iti Dibision ti Eleksion ti county a pagbotosan iti petsa:

Primarya:Agusto 3, 2022, wenno nasapsapa.
Heneral: Oktubre 31, 2022, wenno nasapsapa.

Dagiti rehistrado a botante iti UOCAVA, makapagkiddaw iti absentee ballot babaen ti Federal Post Card Application (FPCA), a suratan ken ipulangda iti Dibision ti Eleksion ti county, pito (7) nga aldaw wenno nakurkurang, sakbay ti aldaw ti eleksion. Nasken nga agkiddawda iti absentee ballot babaen ti FPCA kada tawen ti eleksion.

Maipatulod dagiti balota uppat a pulo ket lima (45) nga aldaw sakbay ti eleksion, segun ti linteg a federal. Dagiti rehistrado a botante iti UOCAVA, makapagkiddaw a ti balotada ket maibuson, mai-email, wenno mai-fax. Nasken a dumanon ti balota iti Dibision ti Eleksion ti maitutop a county, iti aldaw ti eleksion, saan nga naladladaw ngem alas syete ti rabii (7 PM).

Mabalinmo nga ammuen ti ayan wenno kasasaad ti balotam. Damagen iti Dibision ti Eleksion ti maitutop a county.

Programa Federal iti Tulong para Botante

Ti Federal Voting Assistance Program (FVAP) ket tulong kadagiti miembro ti serbisio ken pamiliada, kasta met kadagiti citizen nga agnaed overseas.

Dagiti miembro ti serbisio ken pamiliada, mabalin a kumiddaw iti ad-adu nga impormasion panggep ti panagbotos manipud iti Unit Voting Assistance Officer da:

{insert VAO table}

↑ Agsubli iti ngato

Botante nga Agkasapulan iti Tulong

Ti botante nga agkasapulan iti tulong, gaputta addaan disability, madi unay makakita wenno makanggeg, wenno dina ammo ti agbasa wenno agsurat, mabalinna ti agpatulong iti siasino man a tao, malaksid ti pagtrabahoanna, pannakabagi (ahente) ti pagtrabahoanna wenno pannakabagi ti union ti trabahador.

Rehistro ti Botante

Dagiti tumulong, nasken nga liklikanda ti diskriminasyon, napadlaw man wenno saan, wenno aramid a mangdurog wenno mangiduron iti botante. Maiparit dagitoy.

Dagiti tao wenno organisasion a tumulong nga agrehistro iti botante, maiparit nga i-duplikarda, wenno kopyaen, wenno aramaten iti aniaman a pamuspusan ti aniaman nga impormasyon a naggapu iti Aplikasion iti Rehistro ti Botante. Maikaniw-as iti linteg ti mangaramat, mangi-printa, mangipablaak, wenno mangibunong iti impormasyon a nagtaud iti Aplikasion iti Rehistro ti Botante, deretsa man wenno saan.

Panagbotos iti Koreo

Maawat ti amin a botante a rehistrado ti pakete ti balotada a naibuson, iti manga sangapulo ket walo (18) nga aldaw sakbay ti eleksion. Dagiti botante nga addaan special needs, mabalinda a kiddawen a mangted ti Dibision ti Eleksion iti Balota iti Sabali a Porma (Alternate Format Ballot wenno AFB). Maipatulod ti AFB iti elektronik a pamuspusan, ket mabalin nga i-download ken markaan ti botante daytoy. Maipalubos met nga usarenda iti pribado ken awanan tumulong, dagiti kukuada nga assistive technology.

Mabalin nga ipulang ti nabotosan a balotam iti elektronik a pamuspusan iti Dibision ti Eleksion, wenno ibuson iti opisial a sobre a nailakip iti pakete ti balota a naibuson.

Panagbotos iti sentro ti serbisyo para botante

Dagiti sentro ti serbisyo para botante, addaanda iti alikamen iti panagbotos nga “accessible.” Mabalin ti botante ti mangaramat iti accessible nga ramit a pangmarka iti balota, Verity Touch Writer, tapno suratan, i-printa ken i-pinal ti balota. Ti nai-printa a balota iti kastoy ket kapadpada met laeng dagiti balota dagiti sabali a botante, nagibuson man wenno napan iti sentro ti serbisyo para botante. I-klik ditoy tapno buyaen video ti Verity Touch Writer.

Dagiti Tao a Tumulong iti Botante

No kiddawen ti residente iti care facility a tulungan ti agtrabaho sadiay nga agparehistro ken agbotos, dagitoy nga annuruten ket nasken a tungpalen tapno masaluadan dagiti kalintegan ti botante.

Kontaken ti agtrabaho dagiti kameng ti pamiia ti residente ket iraman ida iti panagrehistro ken panagbotos.

Siguraduen a kalipikado met laeng ti residente nga agrehistro a botante.

Iti itutulong iti panagbotos, ti agtrabaho ket nasken nga ag-neutral, ken dua wenno ad-adu nga tao nga agduma iti partido ti sisasango.

Maiparit a kiddawen iti botante nga ipakitana ti linaon ti balotana, wenno ti pinilina a partido.

Maiparit a ti siasinoman ket markaanna ti balota ti botante wenno isurona ti madama nga agbotos, no awan autorisasionna.

Maikaniw-as iti linteg ti mangpadas nga agbotos iti nagan ti sabali nga awanan autorisasion nga klaro ken naibinsabinsa.

Dagitoy sumaganad, no mapasamak, ket panagsuitik iti panagbotos.

No idiaya ti tao, deretso man wenno saan, ti kuarta ken/wenno napateg a banag iti siasinoman a botante tapno daytoy botante botosanna wenno dina botosan ti siasinoman a tao.

No ti tao, deretsaan man wenno saan, iti personal man wenno iti panangbilin iti sabali, ket ipangtana, pilitenna, wenno butbutngenna ti botante tapno daytoy botante agsanod nga agbotos, wenno tapno botosanna ti siasinoman a tao wenno aniaman a Partido iti aniaman nga eleksion.

Ti tao nga agbotos wenno padasenna ti agbotos, iti nagan ti sabali, nabiag wenno natay, wenno babaen ti parbo a nagan.

Ti tao a nagbotosen, ket si-a-ammo a padasenna ti agbotos manen.

Ti tao a si-a-ammo, a mangted man, wenno mangpadas man a mangted, iti dua wenno ad-adu a balota iti maymaysa nga posision iti tiempo ti panagbotos.

Segun ti linteg ti Hawaii, siasinoman a tao, a si-a-ammo, a mangted iti palso nga impormasion iti Aplikasion iti Rehistro ti Botante, wenno iti aplikasion ti absentee, ket mabalin a makabasol iti Class C felony, ket madusa iti saan nga agsurok iti lima (5) a tawen iti pagbaludan, ken/wenno multa nga sangapulo ribu a dolyar ($10,000).

↑ Agsubli iti ngato

Botante a Nakabasol iti Felony

Maiparit nga agbotos ti botante a nasentensiaan gapu iti felony wenno nadagsen a krimen, mangrugi iti pannakaipataw ti sentensia aginggana a mawayawayaan iti kamaudianan. Nupay no kasta, no ti tao ket naipan iti probation wenno naparolan manipud iti pagbaludan, mabalinna ti agrehistro ken agbotos kabayatan ti probation wenno parol.

Para kumpleto nga impormasion, konsultaren ti Konstitusion ti Estado ti Hawaii, Artikulo II, Seksion 2, ken HRS §831-2.

Guia ti Impormasyon iti Panagbotos Dagiti Naka-probation wenno Naikarsel a di pay Nausig

Sinno ti mabalin nga agbotos?
Ti agrehistro nga agbotos, nasken nga U.S. citizen, residente iti Hawaii, ken sangapulo ket walo (18) wenno ad-adu ti tawenna. Siasinoman a di U.S. citizen, uray pay no U.S. national, ket saan a kalipikado.

Kasano nga apektaran ti pannakai-karsel ti kabalinan nga agbotos?
Maiparit nga agbotos ti tao a nasentensiaan gapu iti felony wenno nadagsen a krimen, mangrugi iti pannakaipataw ti sentensia aginggana a mawayawayaan iti kamaudianan. (Konstitusion ti Estado ti Hawaii, Artikulo II, Seksion 2, ken HRS §831-2.)

Ti tao nga saan pay a nausig, wenno naipan iti probation, wenno naparolan, addaan latta iti kalintegan nga agrehistro ken agbotos.

Automatik kadi nga maisubli ti kalinteganda nga agbotos?

Maisubli iti tao dagiti kalinteganna nga agbotos kalpasan a naturposnan ti sentensiana gapu iti felony. Ngem, saan na kayat a sawen nga automatik a nakarehistro ti tao nga agbotos

Kasano ag rehistro?
Aplikasion iti Rehistro ti Botante: Ibuson ti kumpleto nga Aplikasion iti Rehistro ti Botante iti Dibision ti Eleksion ti county. Ti aplikante nga awanan ID nga naggapu iti estado, mabalinna nga ited ti uppat a maudi a numero ti Social Security Number na.

Rehistro ti botante iti Internet: Makapagrehistro ti botante iti elections.hawaii.gov no addaan iti lisensia nga agmaneho ditoy Hawaii, wenno Hawaii State ID.

Ti address a rumbeng nga ited ti aplikante ket daydiay personal a pagtaengan da a gagangay ken mailing address, saan nga address ti “facility” nga ayanda a madama. Ti personal address a pagtaengana ti mangituldo no ania a distrito ti pagbotosanna.

Kasano ti mangala ken agbotos baben iti absentee ballot
Nasken nga agkiddaw ti botante iti absentee ballot tapno maibuson ti balota na bayat nga awan isuna idiay gagangay a mailing address na.

Ti laeng rehistrado a botante ti maikkan iti absentee ballot. Saan a maproseso ti aplikasyon iti absentee ballot no ti nagkiddaw ket saan a rehistrado a botante.

Ipulang ti aplikasion para Absentee Ballot iti dibision ti eleksion, saan nga naladladaw ngem pito (7) nga aldaw sakbay ti eleksion.

Ti Absentee Ballot Application, adda bisa na iti maysa laeng nga election cycle. Iti kasta, agaplikar manen ti botante kada eleksion nga dina maawat ti suratna idiay gagangay a mailing address na.

Sumangpet ti balota iti botante sangapulo ket walo (18) nga aldaw sakbay ti eleksion, wenno nasapsapa. Nalaka ti pannakaipulang ti balota no nalpasen ti panagbotos, babaen ti opisial a sobre, nga adda address ken selyonan.

↑ Agsubli iti ngato

Dibision ti Eleksion ti County

Dagiti Dibision ti Eleksion ti county ti mangtaming iti rehistro ti botante, pannakaibuson ken pannakaipulang dagiti balota, agraman balota a maisukat no kasapulan; kasta met kadagiti sentro ti serbisyo para botante, ken kadagiti lugar a pakaipulangan ti balota.

{insert county info table}

↑ Agsubli iti ngato

Seguridad ti Eleksion – Dagiti Masansan a Saludsod

Rehistro ti botante

Kasano nga ilimed ti estado no ania a partido ti katimpuyogko?
Babaen ti Konstitusion ti Estado, ti katimpuyogmo a partido ket saan a madakamat no agrehistroka. No kayat ti botante ti agpirme iti maysa a partido, kasaritana ti partido, ta saan a biang ti gobierno ti Estado dayta. No agbotoska iti eleksion nga imatonan ti Estado, primaria wenno heneral, uray ania ti katimpuyogmo a partido, mabalin latta. Ngem, no agbotoska iti salisal dagiti kandidato a presidensyal iti maymaysa a partido, mabalin a kapilitan nga agkamengka.

Mabalin kadi a makansela ti sabali a tao ti rehistrok a botante, nga awan ti ammok?
Makansela ti rehistro ti botante babaen ti “Affidavit for Cancellation of Voter Record,” a pirmaan ken ipulang ti botante iti Dibision ti Eleksion ti county. Makansela laeng ti sabali a tao ti rehistro ti botante, no daytoy ket natayen, ket masapul latta met ti affidavit a pirmado.

No saanak nagbotos idi naudi, makansela kadi ti rehistrok a botante?

No dika nagbotos, madi makansela ti rehistrom basta la ketdi “up to date,” según iti National Voter Registration Act ti 1993. No adda duadua maipanggep iti address mo, wenno no maammuanmi a saanka nga agnaeden iti Hawii, maibusonanka iti card, ta kiddawenmi nga i-update mo ti address mo. Maikkat laeng ti rekordmo iti database, no nabagbagaankan nga ag-update iti rehistrasion, ken dimo inaramid dayta iti dua nga agsaruno nga election cycle. Daytoy ket mandato ti National Voter Registration Act.

Maikkat kadi dagiti partido politikal ti rehistrado a botante iti statewide database?

Dagiti laeng opisial ti eleksion iti State ken County ti maka-access iti statewide database a naglaon kadagiti rehistrado a botante. Dagiti partido politikal ken kandidato, makapagkiddawda iti impormasion ti botante, ngem saanda ma-access daytoy a database.

Pannakaipatulod ti Balota, Pannakaipulangna.

Kasano nga ammok no naibuson ti balota kaniakon? Kasano nga ammok no naawaten ti county?
Mabalinmo a suruten online ti ayan ti balotam babaen ti opisial a ballot receipt portal, ket ag-login iti panangted iti numero ti lisensiam nga agmaneho wenno ti Hawaii State ID. Ibaga ti portal no kaano a naibuson ti balotam ken kaano a naawat ti county.

Ket no ngarud tinakawda ti balotak iti mailbox?
Krimen a federal ti makibiang iti koreo (mail tampering). No ti kunam ket natakaw ti balotam, damagem iti Dibision ti Eleksion ti county no ania ti kasasaad (status) ti balotam, ken agkiddaw iti kasukatna. Kasta met a mabalin mo ti agbotos a personal iti sentro ti serbisyo para botante.

Ania ti aramidek no simmangpet kaniak ti balota a sabali ti akin-nagan?
Ti panangibotos iti balota ti sabali ket panagsuitik nga electoral, ket mabalin nga pakabasolan iti Class C Felony. No adda sumangpet kenka a balota ti tao a saanmo a kabbalay, suratam iti “not at this address”, ket ibuson tapno maisubli.

Mabalin kadi nga ibuson ti sabali ti balotak?
Amin a balota, adda pasurotna nga opisial a sobre nga addaanen iti address ken selyona. Ipan mo laeng iti mailbox mo, alaen ti kartero nokuan. Mabalin pay nga ipulang iti sentro ti serbisyo para botante, wenno iti drop box (kahon a para balota). No masakit wenno disabled ka, ket dimo maipulang ti balotam, mabalin a mangbaon ka ti mapan mangala ken mangi-deliver kadaytoy. Siguraduem nga ipigket ti kalub ti sobre, ket pirmaam samo paisubli.

No adda agbotos iti sentro ti serbisio, kasano a masigurado nga dida pay nagbotos iti balota a naibuson? Amangan ketdi no doble nga botante dayta?
Kada balota ket natatakan iti barcode, ket daytoy, naikudi iti maysa laeng a botante. Iti kasta, matiped ti botante no doblienna ti agbotos. No ti balotana ket naawat ken nai-scannen, daytoy a tao madi mapalubosan nga agbotos iti personal sadiay sentro ti serbisyo para botante. Kasta met a no ti tao ket nagbotosen iti personal, makansela ti balotana a naibuson.

Kasano nga ammoyo nga siak met laeng ti nangibotos ken nangipulang iti balotak?
No maawat ti kada balota, i-scan dagiti opisiales ti eleksion ti pirma iti ruar ti return envelope. Ti pirma ket maidasig iti pirmam a rehistrado. No agpada dagiti pirma, ma-validate ti balotam ket mabalinen a mabilang

Ket no ngarud adda agpirma iti sobre ti balota ti sabali?
No ti nagpirma iti sobre ti balota ket saan a daydiay nainaganan, dayta ket panagsuitik nga electoral, ket mabalin a pakabasolan iti Class C Felony. Aniaman a pirma a madi umarngi ken saan a kumpirmado ti botante, mabalin a pakalasinan iti panagsuitik nga electoral. Ket iti kasta, maiyuli kadagiti pannakabagi ti linteg nga umno. Kasta met a mabalin nga ipulong dagiti botante no adda supetsado a panagsuitik nga elektoral, tapno mapalutpot dagiti pannakabagi ti linteg.

Bilangenyo kadi dagiti balota a madi pirmado?
No maawat dagiti opisiales ti eleksion ti county ti sobre para balota, ket awan pirmana, kontakenda ti botante ket pagpirmaenda. Tapno maibilang ti balota, nasken a risuten ti botante daytoy a depekto iti petsa a

Primarya: Agusto 22, 2022, wenno nasapsapa.
Heneral: Nobiembre 16, 2022, wenno nasapsapa.

Pannakaproseso dagiti balota a nabotosanen

Kasano a masaluadanyo ti kinalimed ti botos ko no ti nagan ken pirmak ket agparang iti sobre a naglaon iti balotak?

Matukad-tukad ti pananglukat kadagiti balota tapno masaluadan ti kinalimed ti botos. Umuna a tukad, maluktan dagiti sobre ket mairuar dagiti ballot secrecy sleeves (panglinged). Maummong dagiti panglinged ken mayadayo kadagiti sobre. No naluktan aminen a sobre, maipanaw da. Itan, maikkat dagiti balota kadagiti panglinged ket maummong da. Awan ti aniaman a personal identifying information (impormasion a pribado a pakalasinan ti tao) kadagiti balota ken panglinged, ken nayadayoda pay kadagiti sobre. Iti kasta, saan a mabigbig no siasinno ti akinkukua iti aniaman a balota.

Kasano a masigurado nga awan balota nga ibelleng dagiti opisiales ti eleksion?

Naka-imatang a kanayon dagiti Official Observer iti pannaka-iyakar ken proseso dagiti balota. Dagitoy nga observer ket agpaay nga pannakabagi dagiti umili, ket siputanda ti panangsaluad dagiti opisiales iti seguridad ken integridad ti eleksion. Kasta pay a ti dagup dagiti balota a naawaten ken dagiti nabilangen ket mapagdasig ken madoble a makontar iti inaldaw-aldaw tapno masigurado nga agpadada.

Kasano nga i-tally yo dagiti resulta? Kasano a matingitingyo no husto met laeng dagiti resulta?

Sakbay ti kada eleksion, ag-testing dagiti opisiales ti eleksion ken Official Observer iti amin nga voting equipment nga usaren a pagbilang iti balota ken pang-tabulate iti resulta. Ti dagup ti nabilang iti makina ket maikumpara iti resulta ti binilang dagiti tao. Daydiay equipment maikkan kadagiti selyos nga nalaka a malasin no adda nangkuriro wenno nakibiang kadakuada. Ti met umuna nga batch ti balota a mabilang iti makina, bilangento manen ti tao tapno makadoble sigurado a husto met laeng ti operasyon ti equipment. Kalpasan ti eleksion, adda pay pinal nga audit, ket mausar ditoy ti random sample a dies porsyento (10%), wenno ad-adu, kadagiti presinto.

Secure met laeng ti voting equipment? Baka ma-hack met ketdi?

Sakbay ti kada eleksion, ag-testing dagiti opisiales ti eleksion ken Official Observer iti amin nga equipment nga usaren iti personal a panagbotos iti sentro ti serbisyo para botante. Tapno sigurado a husto ti operasyon ti equipment, ti resulta daydiay testing ket maikumpara iti resulta a tao ti nangbilang. Daytoy equipment maikkan kadagiti selyos nga nalaka a malasin no adda nangkuriro wenno nakibiang kadakuada. Daytoy nga equipment ket madi naka-connect iti Internet.

Adda pay saludsudenyo?

Agdamag iti Opisina ti Eleksion, wenno kadagiti Dibision ti Eleksion ti county

↑ Agsubli iti ngato

Provisional Voting

Ti Help America Vote Act of 2002 (HAVA) ikkanna ti botante iti kalintegan a mangyawat iti “provisional ballot” no:

Ti maysa a tao ket awan naganna iti opisial a lista dagiti rehistrado a botante; wenno

Sawen ti maysa nga opisial ti eleksion a daydiay tao ket madi kalipikado nga agbotos.

Fail-safe Voting

Ti makuna a fail-safe voter, ket agdadamo nga agbotos, a nangibuson iti Aplikasion iti Rehistro ti Botante. Ngem madi nangipaay iti identification nga imandar ti HAVA, idi man panagrehistrona, wenno idi impulangna ti absentee ballot na. Iti kasta a pasamak, mapalubusan isuna a mangted iti provisional ballot. Nasken nga ited ti botante iti Dibision ti Eleksion ti county a nagbotosanna kadagitoy a petsa:

Primarya: Agusto 22, 2022
Heneral: Nobiembre 15, 2022

Panagbotos babaen ti Provisional Ballot

Sakbay ti panagbotosna babaen ti Provisional Ballot, nasken nga agdeklara ken agpirma daytoy tao nga isuna ket:

Rehistrado a botante iti hurisdiksion a kayatna a pagbotosan; ken

Kalipikado nga agbotos kadaydiay nga eleksion.

Ti provisional ballot ket mailasin kadagiti dadduma a balota aginggana a malpas ti eleksion. Nasken a tingitingen pay dagiti opisial iti Dibision ti Eleksion ti county no kalipikado met laeng daydiay akinbalota, ken no rumbeng a maibilang ti botosna.

Maammuanto ti botante no naibilang wenno saan ti balotana, ken ti rason no apay madi naibilang, iti panagdamag iti Dibision ti Eleksion ti county a nagbotosanna, wenno iti panangkitana iti website ti Opisina ti Eleksion.

Ti ad-adu nga impormasyon ket makita iti HAVA, Title III, Sections 302 & 303.

↑ Agsubli iti ngato